Ishyirahamwe ry’Umupira w’Amaguru muri Aziya (AFC) ntiriratangaza niba rizashyigikira Gianni Infantino ushaka kongera gutorerwa kuyobora FIFA muri manda ya kane, mu matora ateganyijwe muri Werurwe 2027.

Perezida wa AFC, Sheikh Salman bin Ebrahim Al Khalifa, yavuze ko iri shyirahamwe ridashyigikiye cyangwa ngo rirwanye umukandida uwo ari we wese, ashimangira ko icy’ingenzi ari ugufatira ibyemezo bifitiye akamaro umupira w’amaguru.

Yabivugiye i Tokyo mu Buyapani, ku wa Kane tariki ya 22 Ukwakira 2026, asoza inama yamaze iminsi ibiri yari ihuje abayobozi b’umupira w’amaguru muri Aziya.

Yagize ati: “Ntidurwanya umuntu uwo ari we wese kandi nta n’uwo dushyigikiye.”

Amajwi y’ibihugu 47 bigize AFC ashobora kugira uruhare rukomeye mu kugena uzayobora FIFA, bitewe n’uko Infantino ahanganye n’abatamushyigikiye mu Burayi, mu gihe afite abayobozi benshi bamushyigikiye muri Afurika.

Ibi bituma Aziya ishobora kuba umugabane uzagira ijambo rikomeye mu matora azakurikiraho.

Iyi myitwarire ya AFC ije nyuma y’uko mu mezi arenga abiri ashize, iri shyirahamwe ryifatanyije n’andi mashyirahamwe y’umupira w’amaguru yo mu Burayi, Amerika ya Ruguru na Amerika yo Hagati, kunenga Infantino, rimushinja gukora ibinyuranyije n’icyizere yagombaga kugirirwa.

Gusa, ibihugu byo muri Aziya ntibifite umwanya umwe kuri iki kibazo. Qatar, yakiriye Igikombe cy’Isi cya 2022, yamaze kugaragaza ko ishyigikiye Infantino, mu gihe Yorudani yatangaje ko itamushyigikiye.

Infantino kandi aherutse gusaba imbabazi abagize Inama Nyobozi ya FIFA kubera amakosa yakozwe mu gutegura gahunda yari igamije kugurisha imigabane ijyanye n’Igikombe cy’Isi, yari ifite agaciro ka miliyari 4.2 z’amadolari ya Amerika. Iyo gahunda yaje guhagarikwa nyuma yo kunengwa.

Raporo y’Ibiro Ntaramakuru by’Abanyamerika, Associated Press (AP), igaragaza ko amashyirahamwe 87 muri 211 agize FIFA yari amaze kugaragaza ko ashyigikiye Infantino, binyuze mu matangazo yayo cyangwa mu gushyigikira imyanzuro y’amashyirahamwe y’uturere.

Abifuza guhangana na Infantino bafite kugeza ku wa 18 Ugushyingo 2026 kugira ngo batangaze kandidatire zabo. Igihe iyi nkuru yasohokaga, nta mukandida wamuhanganye wari watangajwe ku mugaragaro.

Mu gihe amatora yegereje, icyemezo cya AFC kiracyategerejwe, mu gihe amajwi y’ibihugu byo muri Aziya ashobora kugira uruhare rukomeye mu kugena uzayobora umupira w’amaguru ku rwego rw’isi.

A little more informed. A little more connected.