Ghana yatangaje ko yavumbuye ibikomoka kuri peteroli na gaz mu nyanja yayo, mu bushakashatsi bwakorewe mu gace ka Deepwater Cape Three Points, bikaba ari intambwe nshya mu rugendo rw'iki gihugu rwo kongera umutungo wacyo w'ingufu no gukurura abashoramari.

Iri vumburwa ryatangajwe na Perezida wa Ghana, John Dramani Mahama, ku wa Kabiri tariki ya 10 Ugushyingo 2026, ubwo yafunguraga inama ya 2026 Local Content Conference and Exhibition yabereye mu mujyi wa Takoradi.

Ubushakashatsi bwakorewe ku iriba rya Nya Gyidie-1X, ryacukuwe na sosiyete Planet One Oil and Gas Limited ifatanyije na Ghana National Petroleum Corporation (GNPC) na GOIL Upstream Limited.

Nk'uko GNPC yabitangaje ku wa 10 Ugushyingo 2026, iri vumburwa rifite umwihariko kuko ari ubwa mbere muri Ghana habonetse ibimenyetso by'ibikomoka kuri peteroli mu rutare ruzwi nka carbonate reservoir system, rutari rusanzwe rukoreshwa nk'ahantu h'ingenzi mu bushakashatsi bw'ibikomoka kuri peteroli muri icyo gihugu.

Iri riba riherereye mu birometero 148 uvuye ku nkombe za Ghana, rikaba ryaracukuwe mu nyanja ifite ubujyakuzimu bwa metero 2,289.

Imigabane y'ibigo byagize uruhare muri uyu mushinga igabanyije ku buryo Planet One Oil and Gas Limited ifitemo 75%, GNPC ikagira 15%, naho GOIL Upstream Limited ikagira 10%.

Perezida Mahama yavuze ko iri vumburwa ari ikimenyetso cy'icyizere gishya mu rwego rw'ibikomoka kuri peteroli muri Ghana. Yagaragaje ko intego ari uguhindura umutungo kamere igihugu gifite mo amahirwe y'akazi, ishoramari n'iterambere rirambye.

Umuyobozi wa GNPC, Kwame Ntow Amoah, na we yavuze ko iri vumburwa ridafite akamaro gusa kubera ibikomoka kuri peteroli byabonetse, ahubwo rifungura n'ubundi buryo bushya bwo gukomeza ubushakashatsi mu nyanja ya Ghana.

Yongeyeho ko hakenewe ubundi bushakashatsi bwa tekiniki kugira ngo hamenyekane ingano y'ibyo bikomoka kuri peteroli byabonetse n'ubushobozi bifite bwo kubyazwa umusaruro mu buryo bwunguka.

Iri vumburwa rije mu gihe Ghana ishaka kongera umusaruro wayo w'ibikomoka kuri peteroli, wari umaze igihe ugabanuka, no gukomeza gukurura ishoramari mu rwego rw'ingufu.

A little more informed. A little more connected.