Ikigo gikomeye mu gukora mudasobwa n'ibindi bikoresho by'ikoranabuhanga, Lenovo cyo mu Bushinwa, cyatangaje ko amafaranga cyinjije mu gihembwe cya kabiri cy'umwaka w'ingengo y'imari wa 2026/2027 yiyongereyeho 48%, bitewe ahanini n'izamuka ry'ubucuruzi bw'ibikoresho n'ibikorwa bifashisha ubwenge buhangano (AI).
Raporo y'iki kigo yasohotse ku wa 19 Ugushyingo 2026 igaragaza ko amafaranga yinjije muri icyo gihembwe yageze kuri miliyari 30.24 z'amadolari ya Amerika, avuye kuri miliyari 20.45 yari yinjije mu gihe nk'icyo mu mwaka wabanje.
Iri zamuka ryatumye Lenovo irenga ku byo abasesenguzi b'isoko ry'imari bari bayiteganyirije.
Ikintu cy'ingenzi cyafashije iki kigo kugera kuri ibi bisubizo ni ubucuruzi bw'ibikoresho bifasha mu gukoresha AI, birimo mudasobwa zigezweho, za seriveri n'ibindi bikoresho bibika kandi bigatunganya amakuru menshi.
Lenovo yatangaje ko amafaranga yinjije mu bikorwa bifitanye isano na AI yiyongereyeho 79%, agera kuri miliyari 10.8 z'amadolari, angana na 36% by'amafaranga yose iki kigo cyinjije muri icyo gihembwe.
By'umwihariko, ishami ryayo rikora ibikoresho byifashishwa mu kubaka no gucunga ibikorwa remezo by'ikoranabuhanga ryinjije miliyari 11.3 z'amadolari, ryiyongeraho 178% ugereranyije n'umwaka wabanje.
Nubwo amafaranga yinjijwe yiyongereye cyane, Lenovo yatangaje ko yagize igihombo cya miliyoni 640 z'amadolari ku nyungu isanzwe ibarwa mu bitabo by'imari. Icyakora, inyungu ihinduwe hakuwemo ibiciro bimwe byihariye yazamutseho 166%, igera kuri miliyari 1.36 z'amadolari.
Umuyobozi mukuru wa Lenovo, Yang Yuanqing, yavuze ko ikoreshwa rya AI mu buzima busanzwe rikomeje kwiyongera, bikongera amahirwe y'ubucuruzi haba mu bikoresho byifashishwa n'abantu ku giti cyabo ndetse no mu bigo binini.
Ibi bisubizo bigaragaza uburyo ubwenge buhangano bukomeje guhindura ubucuruzi bw'ikoranabuhanga ku isi, aho ibigo bikora mudasobwa n'ibindi bikoresho by'ikoranabuhanga biri kongera gushora imari mu bikoresho bishobora gutunganya amakuru menshi kandi mu gihe gito.





Comments
No comments yet. Be the first to share a thought.