REG WBBC yatsinze APR WBBC amanota 84-77, yegukana igikombe cy’Irushanwa rya Zone 5 muri Basketball y’abagore. Uyu mukino wa nyuma wabereye muri The Filbert Bayi Olympafrica Centre i Kibaha muri Tanzania, ku wa Gatandatu tariki ya 24 Ukwakira 2026.

REG WBBC yatangiye umukino iri hejuru, isoza agace ka mbere iyoboye n’amanota 22-20. Mu gace ka kabiri, yakomeje gushyiramo ikinyuranyo, amakipe ajya kuruhuka REG iyoboye n’amanota 45-29.

Mu gace ka gatatu, REG yagejeje ikinyuranyo ku manota 20, ariko APR WBBC yagarutse mu mukino igabanya ikinyuranyo, mbere yo kujya mu gace ka nyuma amakipe atandukanywa n’amanota 10, REG iyoboye n’amanota 65-55.

APR WBBC yakomeje kurwana ishaka kwishyura, igabanya ikinyuranyo kigera ku manota atanu, ariko REG WBBC yongera kwigaranzura mukeba wayo, irangiza umukino itsinze amanota 84-77.

Jessica Jackson wa APR WBBC ni we watsinze amanota menshi muri uyu mukino, agira 31, mu gihe Kayana Traylor wa REG WBBC yatsinze amanota 25.

Iki gikombe gifite umwihariko kuri REG WBBC, kuko yari yacyambuwe na APR WBBC mu mwaka wa 2025. Gutsinda uyu mukino byanahesheje amakipe yombi gukomeza guhagararira Zone 5 mu mikino ya Basketball Africa League y’abagore (WBLA) ya 2026.

Imikino ya WBLA 2026 izabera i Alexandria mu Misiri, kuva ku wa 12 kugeza ku wa 20 Ukuboza 2026.

A little more informed. A little more connected.