Ikipe y’u Rwanda ya Benediction Banafrica Team yatangiye urugendo rwayo muri Tour du Cameroun 2026 n’imbaraga zidasanzwe, aho yigaragaje mu gace ka mbere k’isiganwa (Etape 1) kanyuze mu mujyi wa Maroua, yaba ku rwego rw’abakinnyi ku giti cyabo ndetse n’urw’ikipe muri rusange. Aka gace ka mbere katangiye isiganwa rya Tour du Cameroun, kahagurukiye mu mujyi wa Maroua kerekeza i Mora, mbere yo kugaruka gusorezwa i Maroua ku ntera y’ibirometero 124. Umukinnyi  Masengesho Vainqueur  ni we wagize uruhare rukomeye mu gutuma u Rwanda rwinjira neza muri iri ruhanwa, aho yasoje ku mwanya wa kabiri, asiz

Ikipe y’u Rwanda ya Benediction Banafrica Team yatangiye urugendo rwayo muri Tour du Cameroun 2026 n’imbaraga zidasanzwe, aho yigaragaje mu gace ka mbere k’isiganwa (Etape 1) kanyuze mu mujyi wa Maroua, yaba ku rwego rw’abakinnyi ku giti cyabo ndetse n’urw’ikipe muri rusange.

Aka gace ka mbere katangiye isiganwa rya Tour du Cameroun, kahagurukiye mu mujyi wa Maroua kerekeza i Mora, mbere yo kugaruka gusorezwa i Maroua ku ntera y’ibirometero 124.

Umukinnyi Masengesho Vainqueur ni we wagize uruhare rukomeye mu gutuma u Rwanda rwinjira neza muri iri ruhanwa, aho yasoje ku mwanya wa kabiri, asizwe amasegonda make n’uwabaye uwa mbere. Uyu musaruro watumye afata umwanya wa kabiri ku rutonde rusange (General Classification) ndetse n’uwa kabiri mu bahatanira umwambaro w’amanota (Points Classification).

Mugenzi we, Moise Mugisha, na we yagaragaje uburambe n’imbaraga mu misozi, aho yasoje mu itsinda rya mbere ryageze ku murongo. Kuri ubu, Mugisha ari ku mwanya wa kane ku rutonde rusange, akaba anafite umwanya wa kabiri mu bahatanira umwambaro w’umukinnyi urusha abandi mu misozi (Mountains Classification).

Mu cyiciro cy’abakinnyi bakiri bato, u Rwanda rwongeye kuzamura ibendera  binyuze kuri Phocas Nshimiyimana. Uyu musore yitwaye neza cyane, bituma ari we uyoboye urutonde rw’abakiri bato (Young Rider Classification) ndetse anaza ku mwanya wa kane mu batarengeje imyaka 23 (U23).

Umusaruro w’aba bakinnyi bose hamwe washyize Benediction Banafrica Team ku mwanya wa mbere mu makipe yose ari muri Tour du Cameroun 2026. Uyu mwanya uha ikipe icyizere n’icyubahiro mu buryo bwo kuyobora isiganwa no gucunga imyanya yayo mu minsi iri imbere.

Ubu butumwa bukomeye bwatanzwe n’Abanyarwanda ku munsi wa mbere, bwagaragaje ko intego ari ugutahana intsinzi muri Tour du Cameroun y’uyu mwaka. Isiganwa rizakomeza kuzenguruka uduce dutandukanye tw’icyo gihugu, rikaba riteganyijwe kuzasorezwa i Yaoundé, umurwa mukuru wa Cameroun, ku wa 14 Kamena 2026.

A little more informed. A little more connected.