U Rwanda rwongeye gushimangira umuhate warwo mu kurengera ikirere, mu gihe rwizihiza imyaka 10 ishize hemejwe Amasezerano ya Kigali agamije kugabanya imyuka ya Hydrofluorocarbons (HFCs), igira uruhare mu kwihutisha izamuka ry'ubushyuhe bw'isi.

Ibi bijyanye n'inama mpuzamahanga ya 38 y'ibihugu byashyize umukono ku Masezerano ya Montreal (MOP38), iri kubera i Kigali kuva ku wa 2 kugeza ku wa 6 Ugushyingo 2026. Iyi nama ihuza abahagarariye ibihugu bitandukanye, imiryango mpuzamahanga, inzobere mu bidukikije n'abikorera.

Amasezerano ya Kigali yemejwe ku wa 15 Ukwakira 2016 mu nama yabereye i Kigali mu Rwanda. Intego yayo nyamukuru ni ukugabanya buhoro buhoro ikoreshwa n'ikorwa ry'imyuka ya HFCs ikoreshwa cyane mu bikoresho bikonjesha birimo firigo n'ibyuma bikonjesha amazu.

Nubwo iyi myuka itangiza mu buryo butaziguye akayunguruzo k'imirasire y'izuba kazwi nka Ozone Layer, igira uruhare mu kongera ubushyuhe bw'isi. Kuyigabanya rero bifatwa nk'imwe mu ngamba z'ingenzi zo guhangana n'imihindagurikire y'ikirere.

Ishyirwa mu bikorwa ry'aya masezerano rishobora gufasha isi kwirinda izamuka ry'ubushyuhe rishobora kugera kuri dogere Celsius 0.5 mu mpera z'ikinyejana cya 21, nk'uko bigaragazwa n'ubushakashatsi ku ngaruka zo kugabanya imyuka ya HFCs.

Uretse kurengera ikirere, gukoresha ikoranabuhanga rigezweho mu bikoresho bikonjesha bishobora no gufasha mu kugabanya ingufu z'amashanyarazi bikoreshwa, kubungabunga ibiribwa no kurinda imiti kwangirika.

Iyi nama ya MOP38 kandi ni umwanya ku bihugu bitandukanye wo gusuzuma ibyagezweho mu myaka 10 ishize, kurebera hamwe imbogamizi zikigaragara no gufata izindi ngamba zo kwihutisha ishyirwa mu bikorwa ry'Amasezerano ya Kigali.

U Rwanda rwakomeje kugaragaza ubushake mu bikorwa byo kurengera ibidukikije no guhangana n'imihindagurikire y'ikirere, binyuze mu bufatanye n'imiryango mpuzamahanga ndetse no guteza imbere ikoranabuhanga ridahungabanya ibidukikije.

Amasezerano ya Kigali ni imwe mu ntambwe mpuzamahanga zigamije kurengera ikirere, kandi inama iri kubera i Kigali yongeye guha u Rwanda umwanya wo kugaragaza uruhare rufite muri izo ngamba.

A little more informed. A little more connected.