USA: Abanyarwanda n'inshuti zabo batuye Tennessee bibutse ku nshuro ya 29 Jenoside yakorewe Abatutsi

Abanyarwanda batuye muri Leta ya Tennessee n’abatuye mu nkengero zaho muri Leta Zunze Ubumwe za Amerika bifatanyije mu gikorwa cyo Kwibuka ku nshuro ya 29 Jenoside yakorewe Abatutsi mu 1994. Ni igikorwa cyabaye kuri uyu wa Gatandatu ku itariki 10 Kamena,mu mugi wa Knoxville muri Leta ya Tennessee, cyabimburiwe n'Urugendo rwo Kwibuka "Walk to Remember". Urugendo rwatangiriye kuri Kaminuza ya Tennessee saa munani rwitabirwa n'Abanyarwanda, abana, abakuru, abanyamahanga ndetse n'abanyeshuri biga muri Kaminuza ya Tennessee bari kumwe n'uhagarariye abanyeshuri b'abanyamahanga bahiga, Madamu Shayla

Abanyarwanda batuye muri Leta ya Tennessee n’abatuye mu nkengero zaho muri Leta Zunze Ubumwe za Amerika bifatanyije mu gikorwa cyo Kwibuka ku nshuro ya 29 Jenoside yakorewe Abatutsi mu 1994.

Ni igikorwa cyabaye kuri uyu wa Gatandatu ku itariki 10 Kamena,mu mugi wa Knoxville muri Leta ya Tennessee, cyabimburiwe n'Urugendo rwo Kwibuka "Walk to Remember". Urugendo rwatangiriye kuri Kaminuza ya Tennessee saa munani rwitabirwa n'Abanyarwanda, abana, abakuru, abanyamahanga ndetse n'abanyeshuri biga muri Kaminuza ya Tennessee bari kumwe n'uhagarariye abanyeshuri b'abanyamahanga bahiga, Madamu Shayla C Nunnally.

Nyuma y'urugendo abitabiriye uwo muhango bahuriye ahari hateganyijwe muri Kentucky, ahatangiwe ikiganiro cyabanjirijwe n'isengesho.

Abanyarwanda n'inshuti zabo batuye Kentucky na Tennessee , barahuye bibuka ku nshuro ya 29 Jenoside yakorewe Abatutsi

Umuyobozi w'Abanyarwanda batuye muri Tennessee, Kalisa Bahati yahaye ikaze Abanyarwanda n'inshuti z'u Rwanda baje kwifatanya mu kunamira inzirakarengane zazize Jenoside yakorewe Abatutsi mu 1994.

Mu kiganiro Kalisa Bahati  yatanze yagarutse ku bukana Jenoside yakorewe abatutsi yakoranywe ndetse yibutsa buri munyarwanda wese ko Kwibuka ari inshingano za buri umwe.

Yagize ati: "Kwibuka ni uguha agaciro abacu bapfuye bikaba icyarimwe no guhumuriza abarokotse; rero ndashaka gukoresha uyu mwanya kugira ngo mpamagarire mwese abari hano ndetse no ku Isi yose muri rusange gutekereza ku mibabaro, ihungabana n'ingorane abarokotse Jenoside bagize mu 1994".

Abanyarwanda n'inshuti zabo bari bitabiriye

 "Agahinda, ububabare no kwiheba biracyari bishya ku barokotse. Kwibuka bizira inzika cyangwa umwuka wo kwihorera, kubabarira, ndetse no kugira ibyiringiro by'ejo hazaza, kwihangana no kwiyemeza gukomeza intabwe igana imbere, ni bwo buryo bwo gushimangira ko ibyago byagwiririye u Rwanda bitazongera kubaho ukundi. "

Kalisa Bahati yakomeje yerekana uburyo nyuma yaho, abarokotse Jenoside yakorewe Abatutsi, bataheranwe n'agahinda ahubwo bakishakamo ibisubizo biganisha ku iterambere rirambye nk'uko bikubiye mu nsanganyamatsiko y'uyu mwaka: "Kwibuka Twiyubaka".

Asoza ijambo rye yasabye abaraho hose gutahana umukoro wo kurwanya abashaka kugarura Jenoside, abayitegura, abayihakana ndetse n'abandi bose babiba urwango n'ivangura mu bantu.

Mu bandi batanze ikiganiro barimo Nadia Ingabire watanze ubuhamya bw'inzira y'umusaraba yanyuzemo mu gihe cya Jenoside n'uburyo yarokotse, ndetse na Pasteur Emmanuel watanze ubutumwa bw'ihumure ndetse agakangurira n'abantu kubana mu mahoro.

Umuyobozi w'Abanyarwanda batuye muri Kentucky , Serge Rwakineza , yibukije abanyarwanda bose ko Kwibuka ari inshingano za buri wese , asaba ababyeyi kwigisha abana amateka y'igihugu neza batayagoreka , bakabakundisha igihugu ndetse bakavuga ukuri kuri Genocide yakorewe Abatutsi. 

Serge yagize ati" Ni ingenzi kwigisha abana bacu amateka igihugu cyanyuzemo agatuma haba amahano nkayabaye , bizatuma atazongera ukundi. Inshingano z'ababyeyi ni ugushyira imbaraga mu kwigisha ibyabaye mu gihugu cyacu, cyane cyane tukigisha urubyiruko rw'abanyarwanda ruba mu mahanga ko rukwiriye gusura igihugu cyababyaye. Urubyiruko ni ahazaza mu kurwanya Jenoside".

Urubyiruko rwiga muri Kaminuza ya Tennessee rwari rwitabiriye

Muri uyu muhango ,harimo n'urubyiruko rwari rwitabiriye ndetse ruhagarariwe na Madamu Shayla C Nunnally, uhagarariye abanyeshuri b'abanyamahanga biga muri Kaminuza ya Tennessee. Madamu Shayla yavuze ko yababajwe na Jenoside yakorewe Abatutsi mu 1994.

Iki igikorwa kimaze kumenyerwa ku banyarwanda baba muri Leta ya Tennessee, dore ko n'umwaka ushize ubwo hibukwaga ku nshuro ya 28 habaye igikorwa nk'iki cyari cyitabiriwe n'abasaga 150.