Umuhanzikazi nyarwanda Bwiza ateganya kumurika album ye ya gatatu yise Home mu gitaramo kizabera i Lusaka muri Zambia, ku wa 28 Ugushyingo 2026, aho azafatanya n’umuhanzi Bruce Melodie ndetse n’abandi bahanzi bo muri icyo gihugu. Mu mazina y’abahanzi bavuzwe ko bashobora kwiyongera kuri uru rutonde harimo Roberto na Chanda na Kay, bazwi mu muziki wa Zambia.

Iki gitaramo cyiswe Bwiza Home Album Concert kizabera ahitwa KK Mall, mu gace ka Long Acres mu mujyi wa Lusaka. Nk’uko amakuru yatangajwe na BTN Rwanda abitangaza, iki gitaramo kiri mu bikorwa bya Bwiza byo kumenyekanisha album ye nshya no kugeza umuziki we ku bakunzi bashya bo hanze y’u Rwanda.

Bruce Melodie ni umwe mu bahanzi nyarwanda bemejwe ko bazafatanya na Bwiza muri iki gitaramo. Aba bombi basanzwe bafitanye indirimbo yitwa Ogera, iri kuri album ya kabiri ya Bwiza yise 25 Shades, yasohotse mu 2025.

Roberto, amazina ye asanzwe akaba ari Robert Banda, ni umwe mu bahanzi bazwi cyane muri Zambia. Yamenyekanye ku rwego mpuzamahanga binyuze mu ndirimbo Amarulah, yasohotse mu 2015, ikundwa mu bihugu bitandukanye bya Afurika, harimo n’u Rwanda. Izindi ndirimbo ze zizwi zirimo African Woman, Operator, Akasuba na Bestie.

Chanda na Kay ni itsinda ry’abahanzi babiri bo muri Zambia bazwi mu njyana ya hip-hop n’umuziki ugezweho wo muri icyo gihugu. Mu ndirimbo zabo zizwi harimo Bella Bella, Chilowe, Itepe, Tulibamobene na Bulongo. Iyi ndirimbo ya nyuma iri mu zamamaye cyane mu bihangano byabo, inabafasha kurushaho kumenyekana mu muziki wa Zambia.

Kuba igitaramo cya Bwiza kizabera muri Zambia ni amahirwe yo gukomeza kumenyekanisha umuziki nyarwanda ku rwego mpuzamahanga, cyane cyane binyuze mu bufatanye n’abahanzi bo muri icyo gihugu. Ibi bishobora kandi gutuma abakunzi b’umuziki wo mu bihugu byombi barushaho kumenyana binyuze mu bihangano by’abahanzi babo.

Album Home ni iya gatatu ya Bwiza, ikurikira My Dream na 25 Shades. Mu ndirimbo ze zamamaye harimo Ahazaza, Wibeshya, Soja, Boda Boda, Gake Gake na Ogera. Biteganyijwe ko igitaramo cyo muri Zambia kizaba kimwe mu bikorwa byo kumenyekanisha iyi album

nshya.

A little more informed. A little more connected.