Abantu 14 bari mu rugendo rwo kwambuka inyanja ya Mediterane bashaka kugera ku kirwa cya Crete mu Bugereki, bapfuye nyuma y'uko ubwato bari barimo bubonetse mu mazi, mu gihe abandi 18 barokowe.

Nk'uko inzego z'abarinda inkombe zo mu Bugereki zibyemeza, ubwo bwato bwabonetse mu gitondo cyo ku wa Mbere tariki ya 9 Ugushyingo 2026, mu bilometero bigera kuri 28 uvuye ku nkombe z'ikirwa cya Crete.

Amakuru avuga ko abantu 13 basanzwe bapfuye mu bwato, mu gihe undi umwe mu barokowe yaje kugwa mu bitaro aho yari yajyanywe kwitabwaho, bituma umubare w'abapfuye ugera kuri 14.

Abandi bantu 18 barokowe n'ubwato bw'imizigo bwari buturutse muri Maroc, nyuma bajyanwa ku kirwa cya Crete kugira ngo bitabweho.

Abandi bimukira na bo barokowe

Iyi mpanuka ibaye mu gihe inzego z'umutekano zo mu Bugereki zikomeje ibikorwa byo gutabara abimukira bagerageza kwambuka inyanja ya Mediterane baturutse muri Afurika ya Ruguru.

Kuri uwo wa Mbere, abantu barenga 180 bari mu bwato butatu na bo bagaragaye mu mazi berekeza kuri icyo kirwa, nyuma y'uko indege n'utudege tutagira abaderevu bikoresha n'ikigo cy'Ubumwe bw'u Burayi gishinzwe kurinda imipaka, Frontex, bibabonye.

Kugeza ubu, ntiharamenyekana ubwenegihugu bw'abantu 14 bapfuye cyangwa icyateye urupfu rwabo.

Urugendo rwo kwambuka inyanja ya Mediterane rukomeje guteza impungenge, kuko abantu benshi bakomeje kurunyuramo bashaka kugera i Burayi, bahunga ibibazo by'umutekano n'ubukungu mu bihugu bakomokamo.

A little more informed. A little more connected.