Abademukarate begukanye Ubuyobozi mugihe Trump yanze kwemera ko ari we nyirabayazana w’intsinzwi ry’Abarepubulikani

Perezida wa Leta Zunze Ubumwe za Amerika, Donald Trump yashimagije mu buryo budasanzwe abo bahanganye bo mu ishyaka ry’Abademokarate, nyuma y’uko batsinze mu buryo bukomeye amatora . Yanemeye ko intambara ya Iran ishobora kuba yaragize uruhare mu gutsindwa kw’ishyaka rye ry’Abarepubulikani.

Gusa uyu muyobozi w’imyaka 80 yanze kugira uruhare ku giti cye mu gutsindwa kw’ishyaka rye, kwahinduye imiterere y’imyaka ibiri ya nyuma y’ubutegetsi bwe. Ahubwo yagerageje gushyira amakosa kuri bagenzi be bo mu ishyaka ry’Abarepubulikani.

Mu kiganiro yagiranye kuri telefoni n’igitangazamakuru FOX News Democracy 26, Trump yagize ati: “Icyo navuga ni ukubashimira, Abademokarate. Bakoze akazi keza.”

Yakomeje agira ati: “Bamaze imyaka 11 bategereje iyi ntsinzi, none amaherezo barayibonye. Ariko njye simbona ko ari ugutsindwa kwanjye.”

Aya magambo yo gushimagiza abo bahanganye ntiyari asanzwe kuri Trump, kuko mu gihe cyo kwiyamamaza kw’amatora yari yarakunze gushinja Abademokarate ibintu bitandukanye, abita abakomunisiti ndetse n’abayisilamu b’intagondwa.

Trump yongeye kuvuga ko, bitandukanye n’uko byagenze mu matora ya Perezida yo mu 2020 ubwo yatsindwaga, kuri iyi nshuro yemera ibyavuye mu matora kandi ko yiteguye gukorana n’Abademokarate, nyuma y’uko bagiye kugenzura Kongere.

Icyakora, Trump yanaburiye Abademokarate ko yiteguye gukoresha ububasha ahabwa na Perezida kugira ngo ahagarike itegeko iryo ari ryo ryose bazatanga atemeranyaho na ryo.

Yagize ati: “Bashobora kunyoherereza amategeko 50 meza, bishimiye cyane, ariko nkayasubiza nayashyizeho kashe yanditseho ngo ‘VETO’ ”.

Ubushakashatsi bwakozwe mbere y’amatora bwagaragazaga ko intambara ya Iran n’izamuka ry’ibiciro bya peteroli byatewe na yo bitashimishije benshi mu batoye. Trump na we yemeye ko intambara itarangiye ishobora kuba yaragize uruhare mu gutsindwa kw’ishyaka rye.

Mu kiganiro yagiranye na FOX News, yagize ati: “Ntekereza ko Iran yabigizemo uruhare runaka, ariko kandi abantu bari basobanukiwe n’akamaro k’ibyo nakoze kuri Iran.”

Nubwo Trump yagaragaje ubushake bwo kumvikana n’Abademokarate, ntiyigeze agaragaza ko yiteguye kwemera amakosa y’ishyaka rye.

Mu gihe cyo kwiyamamaza, uyu muyobozi w’imyaka 80 yari yarakomeje gusaba Abarepubulikani kwitwara nk’aho na we ari ku rutonde rw’abakandida bari gutorerwa. Ariko ku wa Kabiri, yahinduye imvugo avuga ko kuba atari umukandida byaba ari byo byatumye batsindwa.

Mu butumwa yashyize ku rubuga rwe rwa Truth Social, yagize ati: “Ntabwo nari ku rutonde rw’abakandida, kandi iyo mba nduriho, twari gutsinda ku majwi menshi cyane! Murakoze ku bw’igihe mwampaye.”

Nyuma yaho, Trump yashyize ubutumwa avuga ko agiye kwigira umusesenguzi wa politiki, akagaragaza impamvu Abarepubulikani batsinzwe.

Uwa mbere yagarutseho ni Greg Abbott, wari guverineri wa Texas ushyigikiye Trump, watsinzwe n’umukandida w’Abademokarate Gina Hinojosa.

Trump yavuze ko iyo Abbott ataza guhinduka umuntu wiyitirira kuba Umunyepublika (RINO – Republican In Name Only), atari gutsindwa.

Mu bakandida batsinzwe harimo benshi Trump yari yaritoranyirije kandi akajya hirya no hino muri Amerika abakorera ubukangurambaga, ndetse hari n’aho yageze ashimagiza umukandida w’Abarepubulikani mu matora ya Sena muri Leta ya Ohio, Jon Husted, akoresha amagambo atari asanzwe mu gushima.

Ku rundi ruhande, Ibiro bya Perezida wa Amerika (White House) na byo byagaragaje ko hari ikibazo cy’ubushobozi n’ubwiza bw’abakandida b’Abarepubulikani.

Umukozi wo muri White House yagize ati: “Ubushobozi bw’umukandida ni ingenzi. Perezida Trump yakoze akazi keza ko kwamamaza abakandida benshi bari ku rutonde rw’abatorwaga kurusha uko bo ubwabo babyikoreye.”

Ikibazo gihari ubu ni ukumenya uko Trump azitwara mu myaka ibiri ya nyuma ya manda ye ya kabiri, ubwo azaba ari Perezida udafite imbaraga nyinshi mu bya politiki, kuko Abademokarate bazaba bagenzura Inteko Ishinga Amategeko ya Amerika, ari yo Sena n’Umutwe w’Abadepite.

White House yagaragaje ko Trump ashobora kutazemera gucisha make ngo areke ibintu bigende uko abandi babyifuza.

Intambara ya Iran iracyari mu bitekerezo bya Trump, kandi hari impungenge n’ibitekerezo byinshi bivuga ko ashobora kongera kugaba ibitero bikomeye bya gisirikare kuri Tehran, bikaba byaba ari ugukaza intambara bigaragara ko abaturage batishimiye.

Umukozi wo muri White House yagize ati: “Umuntu wese watoye Abademokarate uyu munsi azicuza cyane icyemezo yafashe, igihe ibiciro bya lisansi bizaba byagabanutse vuba nyuma y’uko ikibazo cya Iran gikemutse, ariko bo bagasigarana urutonde rw’Abademokarate b’intagondwa bashyigikiye ibitekerezo bya liberal.”

White House yanatanze ubutumwa bugaragaza ko hashobora kuba ibikorwa byo kwihimura ku batavuga rumwe na Trump muri politiki.

Uwo mukozi wa White House yagize ati: “Hari ikindi cya nyuma twavuga: uko iby’uyu munsi byagenda kose, Perezida Trump azakomeza kugira ubushake bukomeye bwo guhagarika ibikorwa by’ab’uruhande rw’ibumoso b’intagondwa. Nimwitegure, ibikomeye biracyaza.”