Ku wa Mbere, tariki 2 ugushyingo 2026 Leta Zunze Ubumwe za Amerika zagabye igitero ku kirwa cya Qeshm cyo muri Iran, nk'uko ikinyamakuru The Wall Street Journal cyabitangaje.

Ibi byabaye mu gihe Perezida Donald Trump yatangazaga ko ibiganiro na Tehran bigamije guhagarika intambara imaze amezi umunani biri gutera imbere, mu gihe haburaga umunsi umwe ngo amatora abe.

Iki kinyamakuru, cyifashishije amakuru yatanzwe n'abayobozi ba Leta Zunze Ubumwe za Amerika batashatse ko amazina yabo atangazwa, cyavuze ko igitero cyagabwe kuri Qeshm, ikirwa kinini kurusha ibindi kiri mu Nyanja ya Hormuz, ari cyo giheruka mu bitero bitandukanye ariko bitari binini Amerika imaze ibyumweru byinshi igaba kuri Iran mu ibanga.

Umunyamakuru w'ibiro ntaramakuru Associated Press (AP) yabwiwe n'umwe mu bayobozi ba Amerika, utari wemerewe kugira icyo atangaza ku mugaragaro, ko ibyo bitero byari bigamije ibikoresho n'ibikorwa by'Abanyamerika byibasirwaga n'Abanyirani bakoresheje ibisasu birasa mu ndege.

The Wall Street Journal yatangaje ko Amerika itigeze itangaza ku mugaragaro ibi bitero, mu rwego rwo kwirinda gutanga ikimenyetso cy'uko ishobora gusubukura ibikorwa bikomeye bya gisirikare.

Intambara hagati ya Iran, Amerika na Israel yatangiye ku wa 28 Gashyantare 2026, ubwo Amerika na Israel byagabaga ibitero kuri Iran.

Kuva icyo gihe, Iran yafunze Umuhora wa Hormuz, ufite uruhare rukomeye mu bucuruzi mpuzamahanga, ndetse ikajya igaba ibitero ku mato agerageza kuwunyuramo atabiherewe uburenganzira.

Nubwo kuva muri Nzeri 2026 hari agahenge mu bikorwa bya gisirikare, Amerika na Israel byongeye gukaza iterabwoba kuri Iran mu minsi ishize.

Ibi bibaye mu gihe Amerika yitegura amatora akomeye kuri Perezida Trump, na ho muri Israel hakaba hakomeje kutamenyekana neza uko ibintu bizagenda muri politiki nyuma y'amatora

A little more informed. A little more connected.