Iran: Amato abiri yatewe ibisasu mu Nkombe ya Hormuz

Igisirikare kirwanira mu mazi cya Iran cyatangaje ko amato abiri manini atwara peteroli yari agerageje kunyura mu nzira zitari zemerewe, mu majyepfo y’Inkombe ya Hormuz, yagonzwe n’ibisasu byo mu mazi, araturika.

Ibi byatangajwe n’Igisirikare kirwanira mu mazi cy’Umutwe w’Abasirikare barinda Impinduramatwara ya Kisilamu muri Iran (IRGC), nyuma y’amakuru y’ibikorwa by’umutekano byari byabereye muri ako gace gafite akamaro gakomeye mu gutwara ibicuruzwa ku isi, umunsi umwe mbere yaho.

Nk’uko icyo gisirikare cyabitangaje mu itangazo ryashyizwe ku rubuga rw’amakuru rwacyo, Sepah News, iryo turika ryateje inkongi y’umuriro mu byumba birimo moteri z’ayo bituma ihagarara.

IRGC yatangaje ko ayo mato yari atwaye peteroli mbisi ingana na barili zirenga miliyoni 4.5 zose hamwe, kandi ko abari bayatwaye bavuye mu mato nyuma y’iturika.

Mbere yaho kuri uwo munsi, ikigo cy’amakuru cya Tasnim, gifatwa nk’icyegereye ubutegetsi bwa Iran, cyasubiyemo amagambo y’umuntu wa hafi y’Igisirikare kirwanira mu mazi cya IRGC, wavuze ko urujya n’uruza rw’amato anyura mu Nkombe ya Hormuz yarenze ku mabwiriza rwari rwahagaritswe burundu.

Ibyo ngo byakurikiye igikorwa cya Iran cyo gusenya ibikoresho bifasha amato kumenya icyerekezo no kugena inzira, ndetse no kugaba ibitero ku mato ane yavugwagaho kurenga ku mabwiriza muri ako gace ku wa Kane.

Uwo muyobozi yagize ati: “Mu gihe ibikorwa byo gucuruza peteroli mu buryo butemewe muri iyo nzira byakomeza, hazafatwa izindi ngamba zikomeye kurushaho zo guhangana n’amato arenga ku mabwiriza ndetse n’ibikoresho bya tekiniki biyafasha.”

Muri Gashyantare, Iran yakajije igenzura ryayo ku Nkombe ya Hormuz, ibuza amato afite aho ahuriye na Israel na Leta Zunze Ubumwe za Amerika kunyura mu mutekano, nyuma y’ibitero ibyo bihugu byombi byagabye ku butaka bwa Iran.

Mu bindi bimenyetso byagaragazaga ko umwuka ukomeje kuba mubi muri ako gace, ikigo cy’u Bwongereza gishinzwe gukurikirana ibikorwa by’ubucuruzi bwo mu nyanja, United Kingdom Maritime Trade Operations (UKMTO), cyatangaje ko cyakiriye amakuru y’ikorwa ryabaye ku mugoroba wo ku wa Kane, mu birometero birindwi bya nautical mu majyaruguru y’uburasirazuba bwa Limah, muri Oman.

Nk’uko UKMTO yabitangaje, ubwato bwari butwaye peteroli kandi bwasohokaga muri ako gace bwavuze ko bwagabweho igitero n’ikintu cyarashwe kitamenyekanye, igihe bwanyuraga mu Nkombe ya Hormuz.