Thomas Markle, se wa Meghan Markle, umugore w'igikomangoma Harry cyo mu Bwongereza, yasubijwe muri gereza nyuma yo gukuraho akuma k'ikoranabuhanga yari yambaye ku kaguru kugira ngo ubuyobozi bukomeze kumukurikirana aho aherereye.

Nk'uko ibiro ntaramakuru Reuters byabitangaje ku wa 10 Ugushyingo 2026, Thomas Markle w'imyaka 82 y'amavuko yari yararekuwe by'agateganyo, ategekwa kuguma aho yari atuye no kwambara akuma kamufasha gukurikiranwa n'inzego z'ubutabera.

Icyakora, abashinjacyaha batangaje ko yakuyemo ako kuma mu rukerera rwo ku wa Mbere, bituma basaba urukiko gukuraho uburenganzira yari yarahawe bwo gukurikiranwa ari hanze ya gereza.

Umucamanza Lindsay Griffin yemeye ubusabe bw'abashinjacyaha, ategeka ko Thomas Markle asubizwa muri gereza, aho agomba kuguma mu gihe hagitegerejwe ko urubanza rwe rukomeza.

Uyu mugabo yari yatawe muri yombi ku wa 6 Ugushyingo 2026, akurikiranyweho icyaha cyo gutunga amashusho agaragaza ihohoterwa rishingiye ku gitsina rikorerwa abana. Abashinzwe iperereza bavuga ko mu bubiko yari afite muri Leta ya California habonetse ibikoresho birimo amafoto, filime n'ibindi bikoresho bikekwaho kuba birimo ayo mashusho.

Ku ruhande rwe, Thomas Markle yahakanye ibyo aregwa mbere y'uko atabwa muri yombi. Icyakora, dosiye y'ubushinjacyaha iracyakurikiranwa n'inkiko, kandi ibirego aregwa ntibirafatirwa umwanzuro wa nyuma.

Urukiko kandi rwategetse ko akorerwa isuzuma ry'ubuzima bwo mu mutwe kugira ngo harebwe niba ashobora kumva no gukurikira neza inzira z'urubanza rwe.

Iyi nkuru yongeye kugarura mu itangazamakuru umubano umaze imyaka myinshi utifashe neza hagati ya Meghan Markle na se. Meghan yari aherutse gutangaza ko ababajwe cyane n'ibirego byamuvuzweho, anavuga ko icyemezo cyo kutongera kumuhuza n'abana be cyari kigamije kubarinda.

A little more informed. A little more connected.