Trump Ashaka Ko H-1B Visa Isabwa Kuri $103,265

Ubuyobozi bwa Perezida Donald Trump muri Leta Zunze Ubumwe za Amerika bwatanze icyifuzo cyo gushyiraho amafaranga ya $103,265 ku basaba H-1B visa, ubwoko bwa visa butuma ibigo byo muri Amerika bikoresha abanyamahanga bafite ubumenyi bwihariye mu mirimo nk’ikoranabuhanga, uburezi, ubushakashatsi n’ubwubatsi. H-1B ni gahunda ifasha umukoresha wo muri Amerika gusabira umukozi w’umunyamahanga uburenganzira bwo gukorera muri icyo gihugu mu kazi gasaba ubumenyi bwihariye. Akenshi ikoreshwa mu mirimo isaba impamyabumenyi ya kaminuza cyangwa ubundi bumenyi buhambaye. Umukoresha ni we usanzwe utangira

Ubuyobozi bwa Perezida Donald Trump muri Leta Zunze Ubumwe za Amerika bwatanze icyifuzo cyo gushyiraho amafaranga ya $103,265 ku basaba H-1B visa, ubwoko bwa visa butuma ibigo byo muri Amerika bikoresha abanyamahanga bafite ubumenyi bwihariye mu mirimo nk’ikoranabuhanga, uburezi, ubushakashatsi n’ubwubatsi. H-1B ni gahunda ifasha umukoresha wo muri Amerika gusabira umukozi w’umunyamahanga uburenganzira bwo gukorera muri icyo gihugu mu kazi gasaba ubumenyi bwihariye. Akenshi ikoreshwa mu mirimo isaba impamyabumenyi ya kaminuza cyangwa ubundi bumenyi buhambaye. Umukoresha ni we usanzwe utangira gahunda yo gusabira uwo mukozi, aho kuba umukozi ubwe usaba iyi visa mu buryo busanzwe. Icyifuzo gishya cya Trump cyashyizwe hanze ku wa Mbere, kandi kizabanza gutangirwa ibitekerezo n’abaturage mu gihe cy’iminsi 30 mbere y’uko hafatwa icyemezo cya nyuma. Aya mafaranga yaba asimbuye ay’agateganyo ya $100,000 yari yashyizweho na Trump umwaka ushize, ariko nyuma akabuzwa n’inkiko. Mbere y’izamuka rikomeye ry’aya mafaranga, ibiciro bisanzwe bijyanye na H-1B byari biri hafi ya $2,000 kugeza kuri $5,000, bitewe n’ubwoko bw’ubusabe. Abashyigikiye gahunda ya Trump bavuga ko H-1B ikoreshwa nabi n’ibigo bimwe na bimwe mu guha abanyamahanga imirimo yashoboraga gukorwa n’Abanyamerika. Ku rundi ruhande, ibigo by’ubucuruzi n’abandi bayishyigikiye bavuga ko H-1B ari ingenzi kuko ifasha Amerika kubona abakozi bafite ubumenyi bukenewe cyane cyane mu ikoranabuhanga, uburezi n’ubushakashatsi. Niba iki cyifuzo gishyizwe mu bikorwa, amafaranga menshi ashobora kugira ingaruka ku bigo byo muri Amerika ndetse no ku banyamahanga bashaka kubona amahirwe yo gukorera muri icyo gihugu.